"Apricot stone”-ը հնչեց Mezzo-ում
Ասում են` նա կարող է "Եվրատեսիլը” բերել Հայաստան: "Նա”-երից մեկն էլ
Եվա Ռիվասն է: Այսօր Mezzo ակումբում տեղի ունեցավ երգչուհու "Apricot
stone” /"Ծիրանի կորիզ”/ երգի շնորհանդեսը, որով էլ նա հանդես կգա պետրվարի
14-ին կայանալիք` "Եվրատեսիլ-2010” երգի միջազգային մրցույթի հայաստանյան
նախընտրական փուլին:
Եվա Ռիվասի
"Apricot stone” երգի շնորհանդեսը Mezzo ակումբում
"Apricot stone”-ի երաժշտության հեղինակը կոմպոզիտոր Արմեն Մարտիրոսյանն
է, խոսքերը գրել է պոետ-երգահան Կարեն Կավալերյանը, ով "Եվրատեսիլ”-ում
հնչած արդեն 6 երգի հեղինակ է, այդ թվում "Եվրատեսիլ-2007”-ին Հայկոյի
ներկայացրած "Any time you need”, 2006-ին Դիմա Բիլանի կատարմամբ հնչած
"Never let you go” եւ 2008-ին Անի Լորակի "Shady Lady” երգերի:
Ստեղծագործության գործիքավորումը կատարել է Մուրզոն` Արա Թորոսյանը: Որպես
բեք-վոկալ հանդես են գալու Տիգրան Պետրոսյանն ու Գոգա Խաչատրյանը, եթե
Ռազմիկ Ամյանն էլ չհաղթելու դեպքում համաձայնի այդ դերում հանդես գալ, մեծ
սիրով կընդունեն: Շշուկներ կան, որ դուդուկահարն էլ Ջիվան Գասպարյանն է
լինելու, բայց այդ մասին դեռ բացահայտ չեն խոսում:
Եվա Ռիվասի պրոդյուսերն է "Արմենիա փրոդաքշն” պրոդյուսերական կենտրոնի
հիմնադիր նախագահ Վալերի Սահարյանը, ով էլ Mezzo ակումբում վարեց երգի
շնորհանդեսը:
"Եվրատեսիլ”
մրցույթի առաջին հաղթող` արդեն 76-ամյա Լիս Ասիենը եւ "Արմենիա փրոդաքշն”
պրոդյուսերական կենտրոնի հիմնադիր նախագահ Վալերի Սահարյանը
"Եթե ինչ-որ մեկը համարձակվի ասել` Եվան հայ չէ, կթքեմ երեսին: Ամեն ինչ
կանենք, որ փայլուն ձայն հնչի: Շոուն կլինի Օսլոյում, մեր պատմությունն
ուրիշ է. 14-ին լավ երգ ենք ներկայացնելու”,- ասաց Վալերի Սահարյանը:
"Պատրաստ եմ պատվով ելույթ ունենալ, անգամ հենց վաղն ու Օսլոյում:
Կմասնակցեմ ու կհաղթեմ: Մրցակիցներիս հավասար եմ գնահատում, իմ գործը լավ
երգելն է, ոչ թե ուրիշների երգերը լսելը”,- ասաց Եվա Ռիվասը:
Եվային աջակցելու եւ ոգեշնչելու էր եկել նաեւ "Եվրատեսիլ” մրցույթի
առաջին հաղթողը` արդեն 76-ամյա Լիս Ասիեն: "Երբ Եվայի ձայնը լսում եմ,
արտասվելու ցանկություն է առաջանում, hրաշալի երգչուհի է”,- ասաց նա:
Եվա
Ռիվաս
Եվան եւս մեկ անգամ շեշտեց իր հայկական արմատները: "Ես կարող եմ խոսալ
հայերեն, հասկանում եմ, բայց ամաչում եմ, որովհետեւ 100 տոկոս չգիտեմ:
Այստեղ եմ ապրելու, մի ամսում կսովորեմ”,- ասաց Եվա Ռիվասը` Վալերիա
Րեշոտնիկովա-Ծատուրյանը:
Երգը ճիշտ կատարելուն օգնել է նաեւ Հայաստանի ժողովրդական երգիչ Ռուբեն
Մաթեւոսյանը: Նա եւս իր բարեմաղթանքներն հղեց Եվային:
Ռուբեն
Մաթեւոսյանը եւս ներկա էր "Apricot stone” երգի շնորհանդեսին
"Apricot stone”-ի շնորհանդեսին ներկա էին Սյուզան Մարգարյանը, Նունե
Եսայանը, Ավո Խալաթյանը, Հրանտ Թոխատյանը, Արա Գեւորգյանը, Մրոն` Արսեն
Գրիգորյանը, Սամվել Գրիգորյանը, Տիգրան Պետրոսյանը: "Dorians” ռոք-խումբն
էլ է Եվայի կողքին:
Եվան "Եվրատեսիլի” ապրանք է
"Երգը շատ սիրուն է, հիշվող, եվրոպական: Այդքան որ ասում են հայկական…
Մոռացեք, պետք է հասկանալ` ուր է գնում այս երգը: Կոպիտ ասած` "Եվրատեսիլի”
ապրանք է: Հնգյակում հաստատ կլինենք: Էմմի/Միհրան դուետն էլ,
Ռազմիկ Ամյանն էլ, Եվա Ռիվասն էլ արժանի են հաղթելու, ով էլ լինի, պետք է
կողքին լինենք”,- ասաց Նունե Եսայանը:
Նունե Եսայանը "Apricot
stone” երգի շնորհանդեսին
Ավո Խալաթյանի համար մեծ գործոն է, որ Եվա Ռիվասը գեղեցիկ է. "Ողջ
աշխարհը կտեսնի` ինչ սիրուն աղջիկներ ունենք մենք` հայերս: Երգն էլ շատ
լավն է: Բրավո Եվային, բրավո կազմակերպիչներին (Bravo.am )”:
Ի դեպ, Եվա Ռիվասը 22 տարեկան է, ծնվել է Ռոստով քաղաքում: Մասնակցել է
ՙ5 աստղ՚, ՙՀայաստանի տարվա երգ՚, ՙՌոստովի Ոսկե ձայն՚ մրցույթներին,
որտեղ արժանացել է տիտղոսների: 5 տարի շարունակ ռուսական շոու-բիզնեսում
հանդես գալուց հետո երգչուհին այս տարի նկարահանեց իր առաջին հայկական
տեսահոլովակը` Սայաթ-Նովայի ՙԹամամ աշխարհ՚ երգի հիման վրա: Եվան նաեւ
մոդել է, 13 տարեկանում, ունենալով 180 սմ հասակ, բացառության կարգով
մասնակցել է "Ռոստովի գեղեցկուհի” մեծահասակների մրցույթին եւ արժանացել
"Միսս Տաղանդ” կոչմանը:
Տվյալ պահին կատարվում է "Apricot stone” երգի տեսահոլովակի սցենարի
մշակումը:
|